| 65:1 | ወበእማንቱ፡ መዋዕል፡ ርእየ፡ ኖኅ፡ ከመ፡ አጽነነት፡ ምድር፡ ወከመ፡ ቅሩብ፡ ሀጕላ። | ወበእማንቱ፡ መዋዕል፡ ርእየ፡ ኖኅ፡ ከመ፡ አጽነነት፡ ምድር፡ ወከመ፡ ቅሩብ፡ ሀጕላ። |
|---|
| 65:2 | ወአንሥአ፡ እገሪሁ፡ እምህየ፡ ወሖረ፡ እስከ፡ አጽናፈ፡ ምድር፡ ወጸርሐ፡ ለእምኄዉ፡ ሄኖክ፡ ወይቤ፡ ኖኅ፡ በቃል፡ መሪር፡ ስምዐኒ፡ ስምዐኒ፡ ስምዐኒ፡ ሥልሰ። | ወአንሥአ፡ እገሪሁ፡ እምህየ፡ ወሖረ፡ እስከ፡ አጽናፈ፡ ምድር፡ ወጸርሐ፡ ለእምኄዉ፡ ሄኖክ፡ ወይቤ፡ ኖኅ፡ በቃል፡ መሪር፡ ስምዐኒ፡ ስምዐኒ፡ ስምዐኒ፡ ሥልሰ። |
|---|
| 65:3 | ወይቤሎ፡ ንግረኒ፡ ምንት፡ ውእቱ፡ ዘይትገበር፡ በዲበ፡ ምድር፡ እስመ፡ ከመ፡ ዝ፡ ሠርሐት፡ ምድር፡ ወአንቀልቀለት፡ ዮጊ፡ አነ፡ እትሀጐል፡ ምስሌሃ። | ወይቤሎ፡ ንግረኒ፡ ምንት፡ ውእቱ፡ ዘይትገበር፡ በዲበ፡ ምድር፡ እስመ፡ ከመ፡ ዝ፡ ሠርሐት፡ ምድር፡ ወአንቀልቀለት፡ ዮጊ፡ አነ፡ እትሀጐል፡ ምስሌሃ። |
|---|
| 65:4 | ወበድኅረ፡ ውእቱ፡ ጊዜ፡ ኮነ፡ ሀውክ፡ ዐቢይ፡ ዲበ፡ ምድር፡ ወተሰምዐ፡ ቃል፡ እምሰማይ፡ ወወደቁ፡ በገጽየ። | ወበድኅረ፡ ውእቱ፡ ጊዜ፡ ኮነ፡ ሀውክ፡ ዐቢይ፡ ዲበ፡ ምድር፡ ወተሰምዐ፡ ቃል፡ እምሰማይ፡ ወወደቁ፡ በገጽየ። |
|---|
| 65:5 | ወመጽአ፡ ሄኖክ፡ እምኄውየ፡ ወቆመ፡ ኀቤየ፡ ወይቤለኒ፡ ለምንት፡ ጸራሕከ፡ ኀቤየ፡ ጽራሐ፡ መሪረ፡ ወብካየ። | ወመጽአ፡ ሄኖክ፡ እምኄውየ፡ ወቆመ፡ ኀቤየ፡ ወይቤለኒ፡ ለምንት፡ ጸራሕከ፡ ኀቤየ፡ ጽራሐ፡ መሪረ፡ ወብካየ። |
|---|
| 65:6 | ወትእዛዝ፡ ወፅአ፡ እምኀበ፡ ገጹ፡ ለእግዚእ፡ መናፍስት፡ ዲበ፡ እለ፡ የኀድሩ፡ ውስተ፡ የብስ፡ ከመ፡ ውእቱ፡ ይኩን፡ ኅልቀቶሙ፡ እስመ፡ አእመሩ፡ ኵሎ፡ ኅቡኣተ፡ መላእክት፡ ወኵሎ፡ ግፍዐ፡ ሰይጣናት፡ ወኵሎ፡ ኀይሎሙ፡ ኅቡአ፡ ለእለ፡ ይገብሩ፡ ሥራያተ፡ ወኀይሎሙ፡ ለኅብራት፡ ወኀይሎሙ፡ ለእለ፡ ይሰብኩ፡ ስብኮ፡ ኵሉ፡ ምድር። | ወትእዛዝ፡ ወፅአ፡ እምኀበ፡ ገጹ፡ ለእግዚእ፡ መናፍስት፡ ዲበ፡ እለ፡ የኀድሩ፡ ውስተ፡ የብስ፡ ከመ፡ ውእቱ፡ ይኩን፡ ኅልቀቶሙ፡ እስመ፡ አእመሩ፡ ኵሎ፡ ኅቡኣተ፡ መላእክት፡ ወኵሎ፡ ግፍዐ፡ ሰይጣናት፡ ወኵሎ፡ ኀይሎሙ፡ ኅቡአ፡ ለእለ፡ ይገብሩ፡ ሥራያተ፡ ወኀይሎሙ፡ ለኅብራት፡ ወኀይሎሙ፡ ለእለ፡ ይሰብኩ፡ ስብኮ፡ ኵሉ፡ ምድር። |
|---|
| 65:7 | ወእስኩ፡ እፎ፡ ይትወለድ፡ ብሩር፡ እምጸበለ፡ ምድር፡ ወእፎ፡ ይከውን፡ ነጠብጣብ፡ ዲበ፡ ምድር። | ወእስኩ፡ እፎ፡ ይትወለድ፡ ብሩር፡ እምጸበለ፡ ምድር፡ ወእፎ፡ ይከውን፡ ነጠብጣብ፡ ዲበ፡ ምድር። |
|---|
| 65:8 | እስመ፡ ዓረር፡ ወናእክ፡ ኢይትወለድ፡ እምድር፡ ከመ፡ ቀዳሚ፡ ነቅዕ፡ ውእቱ፡ ዘይወልዶሙ፡ ወመልአክ፡ ዘይቀውም፡ ውስቴታ፡ ወይበድር፡ ውእቱ፡ መልአክ። | እስመ፡ ዓረር፡ ወናእክ፡ ኢይትወለድ፡ እምድር፡ ከመ፡ ቀዳሚ፡ ነቅዕ፡ ውእቱ፡ ዘይወልዶሙ፡ ወመልአክ፡ ዘይቀውም፡ ውስቴታ፡ ወይበድር፡ ውእቱ፡ መልአክ። |
|---|
| 65:9 | ወእምድኅረ፡ ዝ፡ አኀዘኒ፡ እምኄውየ፡ ሄኖክ፡ በእዴሁ፡ ወአንሥአኒ፡ ወይቤለኒ፡ ሑር፡ እስመ፡ ተስእልክዎ፡ ለእግዚአ፡ መናፍስት፡ በእንተ፡ ዝ፡ ሀውክ፡ ዘዲበ፡ ምድር። | ወእምድኅረ፡ ዝ፡ አኀዘኒ፡ እምኄውየ፡ ሄኖክ፡ በእዴሁ፡ ወአንሥአኒ፡ ወይቤለኒ፡ ሑር፡ እስመ፡ ተስእልክዎ፡ ለእግዚአ፡ መናፍስት፡ በእንተ፡ ዝ፡ ሀውክ፡ ዘዲበ፡ ምድር። |
|---|
| 65:10 | ወይቤለኒ፡ በእንተ፡ ዐመፃሆሙ፡ ተፈጸመት፡ ኵነኔሆሙ፡ ወኢይትኌለቍ፡ በቅድሜየ፡ በእንተ፡ አውራኅ፡ ዘኀሠሡ፡ ወአእመሩ፡ ከመ፡ ምድር፡ ትትሀጐል፡ ወእለ፡ የኀድሩ፡ ዲቤሃ። | ወይቤለኒ፡ በእንተ፡ ዐመፃሆሙ፡ ተፈጸመት፡ ኵነኔሆሙ፡ ወኢይትኌለቍ፡ በቅድሜየ፡ በእንተ፡ አውራኅ፡ ዘኀሠሡ፡ ወአእመሩ፡ ከመ፡ ምድር፡ ትትሀጐል፡ ወእለ፡ የኀድሩ፡ ዲቤሃ። |
|---|
| 65:11 | ወለእሉ፡ ምግባእ፡ አልቦሙ፡ ለዓለም፡ እስመ፡ አርአይዎሙ፡ ዘኅቡእ፡ ወእለ፡ ተኰነኑ፡ ወአኮ፡ ለከ፡ አንተ፡ ወልድየ፡ አእመረ፡ እግዚአ፡ መናፍስት፡ እስመ፡ ንጹሕ፡ ወኄር፡ አንተ፡ እም፡ ዝ፡ ኂስ፡ ዘኅቡእ። | ወለእሉ፡ ምግባእ፡ አልቦሙ፡ ለዓለም፡ እስመ፡ አርአይዎሙ፡ ዘኅቡእ፡ ወእለ፡ ተኰነኑ፡ ወአኮ፡ ለከ፡ አንተ፡ ወልድየ፡ አእመረ፡ እግዚአ፡ መናፍስት፡ እስመ፡ ንጹሕ፡ ወኄር፡ አንተ፡ እም፡ ዝ፡ ኂስ፡ ዘኅቡእ። |
|---|
| 65:12 | ወአጽንዖ፡ ለስምከ፡ በማእከለ፡ ቅዱሳን፡ ወየዐቅበከ፡ እምእለ፡ የኀድሩ፡ ዲበ፡ የብስ፡ ወአጽንዖ፡ ለዘርዕከ፡ በጽድቅ፡ ለነገሥት፡ ወለስብሐት፡ ዐቢያት፡ ወእምዘርዕከ፡ ይወፅእ፡ ነቅዐ፡ ጻድቃን፡ ወቅዱሳን፡ ወኍልቊ፡ አልቦሙ፡ ለዓለም። | ወአጽንዖ፡ ለስምከ፡ በማእከለ፡ ቅዱሳን፡ ወየዐቅበከ፡ እምእለ፡ የኀድሩ፡ ዲበ፡ የብስ፡ ወአጽንዖ፡ ለዘርዕከ፡ በጽድቅ፡ ለነገሥት፡ ወለስብሐት፡ ዐቢያት፡ ወእምዘርዕከ፡ ይወፅእ፡ ነቅዐ፡ ጻድቃን፡ ወቅዱሳን፡ ወኍልቊ፡ አልቦሙ፡ ለዓለም። |
|---|