| 61:1 | ወርኢኩ፡ በእማንቱ፡ መዋዕል፡ ተውህቡ፡ ለእልክቱ፡ መላእክት፡ አሕባል፡ ነዊኃን፡ ወነሥኡ፡ ሎሙ፡ ክንፈ፡ ወሰረሩ፡ ወሖሩ፡ መንገለ፡ መስዕ። | ወርኢኩ፡ በእማንቱ፡ መዋዕል፡ ተውህቡ፡ ለእልክቱ፡ መላእክት፡ አሕባል፡ ነዊኃን፡ ወነሥኡ፡ ሎሙ፡ ክንፈ፡ ወሰረሩ፡ ወሖሩ፡ መንገለ፡ መስዕ። |
|---|
| 61:2 | ወተስእልክዎ፡ ለመልአክ፡ እንዘ፡ እብል፡ ለምንት፡ ነሥኡ፡ እሎንተ፡ አሕባለ፡ ነዊኃተ፡ ወሖሩ። | ወተስእልክዎ፡ ለመልአክ፡ እንዘ፡ እብል፡ ለምንት፡ ነሥኡ፡ እሎንተ፡ አሕባለ፡ ነዊኃተ፡ ወሖሩ። |
|---|
| 61:3 | ወይቤለኒ፡ መልአክ፡ ዘምስሌየ፡ የሐውሩ፡ ከመ፡ ይመጥኑ፡ አምጣናተ፡ ጻድቃን፡ ያመጽኡ፡ ከመ፡ ይትመርጐዙ፡ ዲበ፡ ስሙ፡ ለእግዚአ፡ መናፍስት፡ ለዓለመ፡ ዓለም። | ወይቤለኒ፡ መልአክ፡ ዘምስሌየ፡ የሐውሩ፡ ከመ፡ ይመጥኑ፡ አምጣናተ፡ ጻድቃን፡ ያመጽኡ፡ ከመ፡ ይትመርጐዙ፡ ዲበ፡ ስሙ፡ ለእግዚአ፡ መናፍስት፡ ለዓለመ፡ ዓለም። |
|---|
| 61:4 | ወይዌጥኑ፡ ወየኀድሩ፡ ኅሩያን፡ ምስለ፡ ኅሩያን፡ ወእሉ፡ እሙንቱ፡ አምጣናት፡ እለ፡ ይትወሀቡ፡ ለሃይማኖት፡ ወያጸንዑ፡ ቃለ፡ ጽድቅ። | ወይዌጥኑ፡ ወየኀድሩ፡ ኅሩያን፡ ምስለ፡ ኅሩያን፡ ወእሉ፡ እሙንቱ፡ አምጣናት፡ እለ፡ ይትወሀቡ፡ ለሃይማኖት፡ ወያጸንዑ፡ ቃለ፡ ጽድቅ። |
|---|
| 61:5 | ወእሉ፡ አምጣናት፡ ይከሥቱ፡ ኵሎ፡ ኅቡኣተ፡ ለዕመቀ፡ ምድር፡ ወእለ፡ ተሀጕሉ፡ እምበድው፡ ወእለ፡ ተበልዑ፡ እምዓሣተ፡ ባሕር፡ ወእምአራዊት፡ ከመ፡ ያግብኡ፡ ወይትመረጐዙ፡ በዕለተ፡ ኅሩይ፡ እስመ፡ አልቦ፡ ዘይትሀጐል፡ በቅድመ፡ እግዚአ፡ መናፍስት፡ ወአልቦ፡ ዘይክል፡ ተሀጕሎተ። | ወእሉ፡ አምጣናት፡ ይከሥቱ፡ ኵሎ፡ ኅቡኣተ፡ ለዕመቀ፡ ምድር፡ ወእለ፡ ተሀጕሉ፡ እምበድው፡ ወእለ፡ ተበልዑ፡ እምዓሣተ፡ ባሕር፡ ወእምአራዊት፡ ከመ፡ ያግብኡ፡ ወይትመረጐዙ፡ በዕለተ፡ ኅሩይ፡ እስመ፡ አልቦ፡ ዘይትሀጐል፡ በቅድመ፡ እግዚአ፡ መናፍስት፡ ወአልቦ፡ ዘይክል፡ ተሀጕሎተ። |
|---|
| 61:6 | ወነሥኡ፡ ትእዛዘ፡ እለ፡ በመልዕልተ፡ ሰማያት፡ ኵሎሙ፡ ወኀይል፡ ወቃል፡ አሐዱ፡ ወብርሃን፡ አሐዱ፡ ከመ፡ እሳት። | ወነሥኡ፡ ትእዛዘ፡ እለ፡ በመልዕልተ፡ ሰማያት፡ ኵሎሙ፡ ወኀይል፡ ወቃል፡ አሐዱ፡ ወብርሃን፡ አሐዱ፡ ከመ፡ እሳት። |
|---|
| 61:7 | ወለውእቱ፡ መቅድመ፡ ቃል፡ ይባርክዎ፡ ወያሌዕልዎ፡ ወይሴብሕዎ፡ በጥበብ፡ ወይጠበቡ፡ በነገር፡ ወበመንፈሰ፡ ሕይወት። | ወለውእቱ፡ መቅድመ፡ ቃል፡ ይባርክዎ፡ ወያሌዕልዎ፡ ወይሴብሕዎ፡ በጥበብ፡ ወይጠበቡ፡ በነገር፡ ወበመንፈሰ፡ ሕይወት። |
|---|
| 61:8 | ወእግዚአ፡ መናፍስት፡ ዲበ፡ መንበረ፡ ስብሐቲሁ፡ አንበሮ፡ ለኅሩይ፡ ወይኴንን፡ ኵሎ፡ ግብሮሙ፡ ለቅዱሳን፡ በመልዕልተ፡ ሰማያት፡ ወበመዳልው፡ ይደሉ፡ ምግባሮሙ፡ ለኵሎሙ። | ወእግዚአ፡ መናፍስት፡ ዲበ፡ መንበረ፡ ስብሐቲሁ፡ አንበሮ፡ ለኅሩይ፡ ወይኴንን፡ ኵሎ፡ ግብሮሙ፡ ለቅዱሳን፡ በመልዕልተ፡ ሰማያት፡ ወበመዳልው፡ ይደሉ፡ ምግባሮሙ፡ ለኵሎሙ። |
|---|
| 61:9 | ወሶበ፡ ያሌዕል፡ ገጾ፡ ከመ፡ ይኰንን፡ ፍኖቶሙ፡ እንተ፡ ኅብእት፡ በነገረ፡ ስሙ፡ ለእግዚአ፡ መናፍስት፡ ወአሠረ፡ ዚኣሆሙ፡ በፍኖተ፡ ኵነኔ፡ ጽድቅ፡ ዘእግዚአብሔር፡ ልዑል፡ ይትናገሩ፡ ኵሎሙ፡ በአሐዱ፡ ቃል፡ ወይባርኩ፡ ወይሴብሑ፡ ወያሌዕሉ፡ ወይዌድሱ፡ በስሙ፡ ለእግዚአ፡ መናፍስት። | ወሶበ፡ ያሌዕል፡ ገጾ፡ ከመ፡ ይኰንን፡ ፍኖቶሙ፡ እንተ፡ ኅብእት፡ በነገረ፡ ስሙ፡ ለእግዚአ፡ መናፍስት፡ ወአሠረ፡ ዚኣሆሙ፡ በፍኖተ፡ ኵነኔ፡ ጽድቅ፡ ዘእግዚአብሔር፡ ልዑል፡ ይትናገሩ፡ ኵሎሙ፡ በአሐዱ፡ ቃል፡ ወይባርኩ፡ ወይሴብሑ፡ ወያሌዕሉ፡ ወይዌድሱ፡ በስሙ፡ ለእግዚአ፡ መናፍስት። |
|---|
| 61:10 | ወይጼውዕ፡ ኵሉ፡ ኀይለ፡ ሰማያት፡ ወኵሎ፡ ቅዱሳነ፡ ዘመልዕልት፡ ወኀይለ፡ እግዚአብሔር፡ ኪሩቤል፡ ወሱራፌል፡ ወአፍኒን፡ ወኵሎሙ፡ መላእክተ፡ ኀይል፡ ወኵሎሙ፡ መላእክተ፡ አጋእዝት፡ ወኅሩይ፡ ወካልእ፡ ኀይል፡ እለ፡ ውስተ፡ የብስ፡ ወዲበ፡ ማይ። | ወይጼውዕ፡ ኵሉ፡ ኀይለ፡ ሰማያት፡ ወኵሎ፡ ቅዱሳነ፡ ዘመልዕልት፡ ወኀይለ፡ እግዚአብሔር፡ ኪሩቤል፡ ወሱራፌል፡ ወአፍኒን፡ ወኵሎሙ፡ መላእክተ፡ ኀይል፡ ወኵሎሙ፡ መላእክተ፡ አጋእዝት፡ ወኅሩይ፡ ወካልእ፡ ኀይል፡ እለ፡ ውስተ፡ የብስ፡ ወዲበ፡ ማይ። |
|---|
| 61:11 | በይእቲ፡ ዕለት፡ ይነሥኡ፡ አሐደ፡ ቃለ፡ ወይባርኩ፡ ወይሴብሑ፡ ወይዌድሱ፡ ወያሌዕሉ፡ በመንፈሰ፡ ሃይማኖት፡ ወበመንፈሰ፡ ጥበብ፡ ወበትዕግሥት፡ ወበመንፈሰ፡ ምሕረት፡ ወበመንፈሰ፡ ኵነኔ፡ ወሰላም፡ ወበመንፈሰ፡ ኂሩት፡ ወይብሉ፡ ኵሎሙ፡ በአሐዱ፡ ቃል፡ ቡሩክ፡ ወይትባረክ፡ ስሙ፡ ለእግዚአ፡ መናፍስት፡ ለዓለም፡ ወእስከ፡ ለዓለም። | በይእቲ፡ ዕለት፡ ይነሥኡ፡ አሐደ፡ ቃለ፡ ወይባርኩ፡ ወይሴብሑ፡ ወይዌድሱ፡ ወያሌዕሉ፡ በመንፈሰ፡ ሃይማኖት፡ ወበመንፈሰ፡ ጥበብ፡ ወበትዕግሥት፡ ወበመንፈሰ፡ ምሕረት፡ ወበመንፈሰ፡ ኵነኔ፡ ወሰላም፡ ወበመንፈሰ፡ ኂሩት፡ ወይብሉ፡ ኵሎሙ፡ በአሐዱ፡ ቃል፡ ቡሩክ፡ ወይትባረክ፡ ስሙ፡ ለእግዚአ፡ መናፍስት፡ ለዓለም፡ ወእስከ፡ ለዓለም። |
|---|
| 61:12 | ይባርክዎ፡ ኵሎሙ፡ ቅዱሳን፡ እለ፡ ኢይነውሙ፡ በመልዕልተ፡ ሰማይ፡ ወኵሎሙ፡ ኅሩያን፡ እለ፡ የኀድሩ፡ ውስተ፡ ገነት፡ ሕይወት፡ ወኵላ፡ መንፈሰ፡ ብርሃን፡ ዘትክል፡ ባርኮቶ፡ ወሰብሖቶ፡ ወአልዕሎቶ፡ ወቀድሶቶ፡ ለስምከ፡ ቅዱስ፡ ወኵሉ፡ ዘሥጋ፡ ዘፈድፈደ፡ እምኀይል፡ ትሴብሕ፡ ወትባርክ፡ ለስምከ፡ ለዓለመ፡ ዓለም። | ይባርክዎ፡ ኵሎሙ፡ ቅዱሳን፡ እለ፡ ኢይነውሙ፡ በመልዕልተ፡ ሰማይ፡ ወኵሎሙ፡ ኅሩያን፡ እለ፡ የኀድሩ፡ ውስተ፡ ገነት፡ ሕይወት፡ ወኵላ፡ መንፈሰ፡ ብርሃን፡ ዘትክል፡ ባርኮቶ፡ ወሰብሖቶ፡ ወአልዕሎቶ፡ ወቀድሶቶ፡ ለስምከ፡ ቅዱስ፡ ወኵሉ፡ ዘሥጋ፡ ዘፈድፈደ፡ እምኀይል፡ ትሴብሕ፡ ወትባርክ፡ ለስምከ፡ ለዓለመ፡ ዓለም። |
|---|
| 61:13 | እስመ፡ ብዙኅ፡ ምሕረቱ፡ ለእግዚአ፡ መናፍስት፡ ወርሑቀ፡ መዓት፡ ወኵሎ፡ ግብሮ፡ ወኵሎ፡ ኀይሎ፡ በአምጣነ፡ ገብረ፡ ከሠተ፡ ለጻድቃን፡ ወለኅሩያን፡ በስሙ፡ ለእግዚአ፡ መናፍስት። | እስመ፡ ብዙኅ፡ ምሕረቱ፡ ለእግዚአ፡ መናፍስት፡ ወርሑቀ፡ መዓት፡ ወኵሎ፡ ግብሮ፡ ወኵሎ፡ ኀይሎ፡ በአምጣነ፡ ገብረ፡ ከሠተ፡ ለጻድቃን፡ ወለኅሩያን፡ በስሙ፡ ለእግዚአ፡ መናፍስት። |
|---|